जेन–जीका नाममा कर्मचारीलाई धम्क्याउने अर्जुन शाही पक्राउ

काठमाडौं । जेनजी आन्दोलनको नाममा कर्मचारीहरूलाई धम्क्याएको आरोपमा अर्जुनबहादुर शाही पक्राउ परेका छन्। जिल्ला प्रहरी परिसर, काठमाडौंले उनलाई बुधबार नियन्त्रणमा लिएको हो। शाहीका गतिविधिबारे निरन्तर गुनासो आउन थालेपछि पक्राउ गरिएको प्रहरीले बताएको छ । ‘जेन–जी’ आन्दोलनपछि ज्ञापनपत्र बुझाउने भन्दै शाहीले विभिन्न सरकारी निकायका प्रमुखहरूलाई भेटेर सवाल–जवाफ गर्ने र धम्क्याउने गरेको आरोप लागेको छ।
नागरिक उड्डयन प्राधिकरण र नेपाल वायुसेवा निगमका कर्मचारीहरूले समेत उनको व्यवहारप्रति असन्तुष्टि जनाएका थिए।अनुसन्धानका क्रममा शाही वैदेशिक रोजगारी ठगी र बैंकिङ्ग कसुरमा समेत संलग्न रहेको तथ्य बाहिर आएको प्रहरीले जनाएको छ। उनी यसअघि पनि २०८२ साल वैशाख २८ गते उपत्यका अपराध अनुसन्धान कार्यालयद्वारा वैदेशिक रोजगारसम्बन्धी मुद्दामा पक्राउ परेका थिए।