आज थपिए अहिलेसम्मकै बढी कोरोना संक्रमित

काठमाडौं । कोरोना संक्रमण बढ्दै जाने क्रममा बिहीबार देशभर कोरोनाका १२२८ संक्रमित थपिएका छन्। जुन २४ घण्टामा थपिएको अहिलेसम्मकै धेरै संक्रमित हो । स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले पछिल्लो २४ घण्टामा सो संख्याका संक्रमित थपिएको जानकारी दिए। यसअघि गत आइतबार एकैदिन १२२१ जना कोरोना संक्रमित थपिएका थिए। यीसहित हालसम्म संक्रमितको संख्या ४२ हजार ८ सय ७७ पुगेको छ। पछिल्लो २४ घण्टामा ९ सय ७ जना कोरोनाबाट मुक्त भई घर फर्किएका छन्। यीसहित हालसम्म कोरोनाबाट निको हुनेको संख्या २४ हजार २ सय ७ पुगेको छ। सक्रिय संक्रमितको संख्या १८ हजार ४ सय १३ पुगेको छ। पछिल्लो २४ घण्टामा थप ६ जना कोरोना संक्रमितको मृत्यु भएको छ। योसँगै कोरोनाबाट मृत्यु हुनेको संख्या २ सय ५७ पुगेको छ।

उपत्यकामा ४४५ थना थपिए
उपत्यकामा थप ४४५ जनामा कोरोनाभाइरस संक्रमण पुष्टि भएको छ । काठमाडौंमा ३५७, ललितपुरमा ४६ र भक्तपुरमा ४२ जनामा कोरोना संक्रमण पुष्टि भएको हो । बुधबार काठमाडौं उपत्यकामा ३८८ जनामा कोरोना संक्रमण पुष्टि भएको थियो ।