असोज २४ सम्म कर्मचारीलाई नचलाइने

काठमाडौँ । निजामती कर्मचारीहरूको आधिकारिक ट्रेड युनियन निर्वाचन सम्पन्न नभएसम्म कुनै पनि कर्मचारीलाई यता उता नगरिने भएको छ । असोज २४ गतेसम्मका लागि कुनै पनि कर्मचारीको सरुवा तथा काज सरुवा नहुने भएको छ । सङ्घीय मामिला तथा सामान्य प्रशासन मन्त्रालयले सूचना जारी गर्दै असोज १ गतेदेखि २४ गतेसम्म सरुवा तथा काज नहुने जनाएको हो ।

निजामती कर्मचारीहरूको आधिकारिक ट्रेड युनियन निर्वाचन, आचार संहिता २०७७, जारी गर्दै प्रमुख निर्वाचन अधिकृतको कार्यालयले निर्वाचन सम्पन्न नभएसम्म निर्वाचनमा मतदाता हुने कर्मचारीको सरुवा, काज सरुवा लगायतका कार्य नगर्न नगराउन गरेको अनुरोधसँगै मन्त्रालयले ती कर्मचारीको काज, सरुवा रोकेको हो ।

गत सोमबार मात्रै प्रमुख निर्वाचन अधिकृतको कार्यालयले मन्त्रालयहरूलाई पत्र पठाउँदै कर्मचारीको सरुवा नगर्न र भइसकेको भए रमाना नदिन निर्देशन दिएको थियो । आगामी २४ असोजमा हुने निजामती कर्मचारीहरूको आधिकारिक ट्रेड युनियनको चुनावको चटारो बढिरहेको बेला यस्तो निर्णय आएको हो ।