ग्लोबल आइएमई बैंकको नाफा बढ्यो

काठमाण्डौ । देशकै अग्रणी वाणिज्य बैंकमध्ये एक ग्लोबल आइएमई बैंक लिमिटेडले चालु आर्थिक वर्ष २०८२–८३ को पहिलो त्रैमासमा नाफा वृद्धि कायम राख्न सफल भएको छ। तर ब्याज आम्दानी र सञ्चालन लागतबीचको सन्तुलन हेर्दा बैंकको दक्षता सुधार अझै चुनौतीपूर्ण देखिएको छ। बैंकले असोज मसान्तसम्म १ अर्ब ८५ करोड ५८ लाख रुपैयाँ खुद नाफा कमाएको छ, जुन अघिल्लो वर्षको सोही अवधिभन्दा करिब २३ प्रतिशत बढी हो। नाफा वृद्धिको मुख्य कारण भनेको ब्याजदरको स्थिरीकरणसँगै असल ऋण पोर्टफोलियोमा सुधार र गैरब्याज आम्दानीको विस्तार हो। निवल ब्याज आम्दानी भने मात्र ०.३४ प्रतिशत वृद्धि भएको छ, जुन सीमित वृद्धि हो। यसले बैंकले नाफा बढाउन ब्याजभन्दा बढी खर्च व्यवस्थापन र अन्य आय स्रोतहरूमा निर्भरता बढाएको संकेत गर्छ। त्यस्तै, बैंकले सञ्चालन मुनाफा १०.४४ प्रतिशतले बढाएर २ अर्ब ३७ करोड रुपैयाँ पुर्‍याएको छ। यसबाट लागत नियन्त्रणको रणनीति प्रभावकारी रहेको देखिन्छ। बैंकको निक्षेप संकलन ५.७४ प्रतिशतले बढेर ५ खर्ब ८२ अर्ब रुपैयाँ पुगेको छ भने कर्जा प्रवाह २.७२ प्रतिशत बढेको छ। यो वृद्धिले बैंकले सावधानीपूर्वक ऋण विस्तार नीति अपनाएको देखाउँछ। जोखिमपूर्ण ऋण विस्तार नगरी स्थिर ब्याज आम्दानी कायम राख्नुले दीर्घकालीन वित्तीय सुदृढता संकेत गर्छ। समीक्षा अवधिसम्म बैंकको वितरणयोग्य नाफा ४ अर्ब ८४ करोड रुपैयाँ पुगेको छ, यो गत वर्षको भन्दा झण्डै दोब्बर हो। यसले आगामी वर्ष लाभांश वितरणमा शेयरधारकको अपेक्षा बढाएको छ। बैंकले अहिले देखाएको वृद्धि परिमाणभन्दा पनि गुणात्मक सन्तुलनतर्फ मोडिएको देखिन्छ। ब्याज आम्दानी सीमित रहे पनि गैरब्याज आय र सञ्चालन दक्षतामा सुधार भएको छ। ग्लोबल आइएमई बैंकको पहिलो त्रैमासिक नतिजाअनुसार ब्याज आम्दानीको न्यून वृद्धिले भविष्यमा सञ्चालन दवाव बढ्न सक्ने संकेत गर्छ। यदि बैंकले कर्जा ब्याज दरमा प्रतिस्पर्धा, शुल्क सेवामा विविधता र डिजिटल आम्दानी स्रोत विस्तारमा गति दियो भने चाहि आगामी त्रैमासमा अझ सन्तुलित वृद्धि सम्भव देखिन्छ।