खाद्यलेआइतबारदेखि उपत्यकामा खसीबोका भित्र्याउने

काठमाण्डाै । खाद्य व्यवस्था तथा व्यापार कम्पनी लिमिटेडले आइतबारदेखि उपत्यकामा खसीबोका भित्र्याउने भएको छ । प्रत्येक वर्ष घटस्थापनाको दिन भित्र्याएर भोलिपल्टदेखि बिक्री गर्दै आएकोमा यो वर्ष खरिद गर्न ढिलाई भएकाले ३ कात्तिकबाट मात्र बिक्री खुला गरिने कम्पनीले जानकारी दिएको छ ।बजार मूल्य हस्तक्षेप गरी उपभोक्तालाई सहुलियत दिनका लागि कम्पनीले विभिन्न जिल्लाबाट खरिद गरेर ल्याउन लागेको हो ।
यो वर्ष च्याङ्ग्रा खरिद गर्न नपाइएकाले खसीबोका मात्र ल्याउन लागिएको कम्पनीले जनाएकाे छ ।  पहिलो चरणमा एक हजार संख्यामा खसीबोका ल्याइने र माग बढ्दै गयो भने थप गर्न सकिने कम्पनीले जानकारी दिएको छ । कोराना भाइरसको कारणले गर्दा यो वर्ष अघिल्ला वर्षको तुलनामा खसीबोकाको खपत कम हुने अनुमान गरिएको छ ।
दसैंमा उपत्यकामा खसीबोकाको खपत धेरैे हुँदा व्यवसायीले बढी मूल्य निर्धारण गरि उपभोक्ता ठगिने सक्ने भन्दै कम्पनीले बजार मूल्य हस्तक्षेप गर्नका लागि खसीबोका बिक्री गर्न लागेको जनाएको छ । कम्पनीले प्रतिकेजी १० रुपैयाँ छुट दिने भएको छ । कम्पनीले गत वर्ष १८ करोड ७८ लाख ५ हजार रुपैयाँ लागतमा एक हजार संख्यामा खसीबोका र ३८ करोड ३२ लाख २१ हजार लागतमा २ हजार संख्यामा च्याङ्ग्रा ल्याएर बिक्री गरेको थियो ।